අගමැති ෆින්ලන්ත ගමනින් පසු පාසැල් විභාග අහෝසි වේද?

ranilෆින්ලන්ත අධ්‍යාපන ක්‍රමය විභාග පදනම් නොවූ එකක් බවත් ලංකාවේ ක්‍රමය දරුවන්ට පීඩනයක් බවත් ශ්‍රී ලංකාව සහ ෆින්ලන්තය අතර ක්ෂේත්‍ර ගණනාවක් ආවරණය වන පරිදි ගිවිසුම්වලට එළැමීමෙන් පසු අධ්‍යාපන ඇමති අකිල විරාජ් කාරියවසම් මහතා විශේෂ ප්‍රකාශයක් කරමින් පැවසීය. ලෝකයේ හොඳම අධ්‍යාපන ක්‍රමය ක්‍රියාත්මක වන ෆින්ලන්තය සමග ඇතිකරගත් මෙම ගිවිසුම් හරහා ශ්‍රී ලංකාවේ පාසැල් තුල වෘත්තීය අධ්‍යාපනය දියුණු කිරීම ඇතුළු තවත් ක්ෂේත්‍ර ගණනාවක ප්‍රගමනයට මූලික අත්තිවාරම දැමූ බවද හෙතෙම කීය.

ෆින්ලන්ත සංචාරයෙන් පසු අධ්‍යාපන ඇමති අකිල විරාජ් කාරියවසම් මහතා සිදුකළ විශේෂ ප්‍රකාශය සම්පූර්ණයෙන් මෙසේය.

“ලෝකයේ හොඳම අධ්‍යාපන ක්‍රමය ක්‍රියාත්මක වන රට වන්නේ ෆින්ලන්තයයි. අප එහි සිදුකළ සංචාරයේ දී එරට ක්‍රියාත්මක අධ්‍යාපන ක්‍රමය සම්බන්ධයෙන් විශේෂ අධ්‍යයනයක් සිදු කළා. එමගින් ෆින්ලන්ත අධ්‍යාපනය ක්‍රමය සම්බන්ධයෙන් හොඳ අවබෝධයක් ලබාගැනීමට අපට හැකි වුණා. වෙනත් රටවල් හා සැසඳීමේ දී ෆින්ලන්තයේ පාසල් තුළ දරුවන් ඉගෙන ගන්නා කාලය සීමිත කර ඇති බව අපට දැක ගැනීමට හැකි වුණා.

පාසල් වෘත්තීය අධ්‍යාපනය පිළිබඳ ෆින්ලන්ත අධ්‍යාපන විශේෂඥයන්ගේ දැනුම අප රටට ලබාදීමට එකඟතාවය පළ කර තිබෙනවා. ඒ වෙනුවෙන් ඉදිරියේ දී සැලසුම් සහගත වැඩපිළිවෙළක් ක්‍රියාත්මක කිරීමට බලාපොරොත්තු වෙනවා.

එමෙන්ම ෆින්ලන්ත අධ්‍යාපන ක්‍රමය හා ශ්‍රී ලංකාවේ අධ්‍යාපන ක්‍රමය පිළිබදව අධ්‍යයනය කිරීමේ දී ශ්‍රී ලංකාවේ අධ්‍යාපන ක්‍රමය තුළින් දරුවන්ට විශාල පීඩනයක් එල්ල වී තිබෙන බව හඳුනා ගැනීමට පුලූවන්. එක් එක් විෂයයන්ට අදාලව වසරක් තුළ හදාරන විෂය කරුණු ප්‍රමාණය අධික බව පෙනී යනවා. නමුත් ෆින්ලන්තයේ අඩු අධ්‍යයන කාලය, ප්‍රායෝගික අධ්‍යයනයට මුල් තැන ලබාදීම, විභාග අවම කිරීම, ගුරුවරුන්ගේ විශේෂඥ භාවය, එනම් සෑම ගුරුවරයෙකුටම අවම වශයෙන් උපාධියක් සහ පශ්චාත් උපාධියක් අනිවාර්ය වීම, එක් පන්තියක අඩු සිසුන් සංඛ්‍යාවක් සිටීම නිසා එක් එක් දරුවන්ට පෞද්ගලිකව අවධානය යොමු කිරීම ආදී විශේෂ ලක්‍ෂණ ගණනාවක් ෆින්ලන්ත අධ්‍යාපන ක්‍රමය තුළ ක්‍රියාත්මක වනවා.

මීට අමතරව අවුරුදු 15 – 20 ක ඉදිරි දැක්මක් අනුව අධ්‍යාපන ප්‍රතිසංස්කරණ සිදු කිරීම, අධ්‍යාපනය සඳහා ඩිජිටල් තාක්‍ෂණය යොදා ගැනීම ආදී ෆින්ලන්ත අධ්‍යාපන ක්‍රමය තුළ ක්‍රියාත්මක වන සාධනීය කරුණු ගණනාවක් පිළිබදව අපි අවධානය යොමු කළා.

ෆින්ලන්තයේ ඉගැන්වීම් ක්‍රමවේදය ඉතාම දියුණු මට්ටමක පවතින අතර මෙහිදී ප්‍රායෝගික අධ්‍යාපනය සඳහා වැඩි අවධානයක් යොමුකර තිබෙන බව දැකිය හැකියි. ෆින්ලන්තයේ වෘත්තීය අධ්‍යාපනය ලබාදෙන අධ්‍යාපන පීඨයන්හි නිරීක්‍ෂණ චාරිකාවකට එක්වීමට අපට අවස්ථාව ලැබුණා. ප්‍රායෝගිකත්වය මුල් කර ගනිමින් බොහෝ ඉගෙනුම් හා ඉගැන්වීම් ක්‍රමවේද සකස් කර තිබෙන ආකාරය අපට එහිදී දැක ගැනීමට හැකි වුණා.

දශක ගණනාවකින් අපේ අධ්‍යාපන ක්‍රමයේ දැවැන්ත වෙනස්කම් සිදු වී නැහැ. විශේෂයෙන්ම විෂය මාලා සංශෝධනය කිරීම, නව ලෝකයට ගැලපෙන ආකාරයේ අධ්‍යාපන ක්‍රමයක් ලබාදීමට අපට හැකි වී නැහැ. එම නිසා අප ආරම්භ කළ වසර 13 ක අනිවාර්ය පාසල් අධ්‍යාපනය සහ හඳුන්වාදීමට නියමිත නව විෂයයන් 26 තුළින් ඉදිරියේ දී අපේ අධ්‍යාපන ක්ෂේත්‍රයේ පෙරළියක් සිදු කිරීමට අප බලාපොරොත්තු වෙනවා.

අප දැනට ආරම්භ කර තිබෙන නියාමක වැඩසටහන අනුව සාමාන්‍ය කලා විෂයයන් හැදෑරූ ශිෂ්‍ය ශිෂ්‍යාවන් ද මෙම වෘත්තීය විෂයයන් 26 තුළින් තමන්ගේ දක්‍ෂතාවය අනුව ඊට නැඹුරු වන ආකාරය දැකිය හැකියි.

ෆින්ලන්තයේ විභාග පාදක ක්‍රමවේදයක් ක්‍රියාත්මක නොවන අතර කුඩා අවධියේ සිටම දරුවන්ගේ දක්‍ෂතාවය හා හැකියාව අනුව යා යුතු මාර්ගය පෙන්වා දෙන ක්‍රමවේදයක් ෆින්ලන්ත අධ්‍යාපන ක්‍රමය විසින් ඇති කර ගෙන තිබෙනවා.

ෆින්ලන්තයේ පාසල් පාදක වෘත්තීය අධ්‍යාපන ක්‍රමය මීට වසර 20 කට වඩා වැඩි ඉතිහාසයක් තිබෙන අතර ඒ තුළින් සාර්ථකත්වය කරා ළඟා වීමට ඔවුන්ට හැකි වී තිබෙනවා. එම නිසා ෆින්ලන්ත අධ්‍යාපන ක්‍රමය ආශ්‍රය කර ගෙන ලෝකය දිනා ගැනීමට හැකි අධ්‍යාපන ක්‍රමයක් ස්ථාපිත කිරීම අපේ බලාපොරොත්තුවයි.

ශ්‍රී ලංකාවේ මුදල් අමාත්‍යංශ ලේකම් ආචාර්ය ආර් එස් එච් සමරතුංග මහතා සහ ෆින්ලන්ත විදේශ කටයුතු අමාත්‍යංශයේ අධ්‍යක්‍ෂ ජනරාල් සතු සන්තලා (Satu Santala) මහත්මිය අතර අත්සන් තැබුණු ගිවිසුම හරහා අපේ රටේ අධ්‍යාපනයට ඉතා සුභදායී වෙනසක් ඇති කර ගැනීමට හැකි වනු ඇතැයි බලාපොරොත්තු වෙනවා.

ඒ වගේම, අපේ අධ්‍යාපන ක්‍රමය නිරීක්‍ෂණය කර ඇති කළ යුතු වෙනස්කම් සම්බන්ධයෙන් අවශ්‍ය විශේෂඥ දැනුම ලබාදීම සඳහා ෆින්ලන්තයේ අධ්‍යාපන විශේෂඥයන් කණ්ඩායමකට අපේ රටට පැමිණෙන්නැයි ආරාධනය කළා.

සබැඳි පුවත්

[shareaholic app="recommendations" id="27363332"]

Leave a Reply

Your email address will not be published.