හංස මාර්ක් ශලීල ගැන අළුත්ම තොරතුරු

shalilaතායිවාන බැංකුවක පරිගණක පද්ධතියට ඇතුළුවී රුපියල් කෝටි 11කට ආසන්න මුදලක් වංචා කළැයි අත්අඩංගුවට ගනු ලැබ සිටින ලිට්රෝ ගෑස් සමාගමේ මෙරට සභාපති ශලීල මුණසිංහ ගේ වැඩ තහනම් කර ඇතැයි ලිට්රෝ සමාගම පවසයි. රාජ්‍ය ව්‍යවසාය සංවර්ධන ඇමැති කබීර් හෂීම් මහතාගේ උපදෙස් මත එසේ වැඩතහනම් කරනු ලැබ ඇත.

ෆාර් ඊස්ටන් ඉන්ටර්නැෂනල් නමැති ජාත්‍යන්තර බැංකු ජාලයේ තායිවාන ශාඛාවෙන් ඩොලර් මිලියන 60 ක පමණ මුදලක් බැංකු ජාලය හැක් කිරීමෙන් අන්තර් ජාල වයර් ට්‍රාන්සර් ක්‍රමය මගින් සොරකම් කර ඇති අතර එම මුදලින් කොටසක් ලංකාවේ ලිට්රෝ ගෑස් සමාගමේ සභාපති ශලීල මුණසිංහ මහතාට අයත් ගිණුමක ඔහු දැනුවත්ව තිබීමත් ඔහු එම මුදල් පරිහරණය කිරීමත් හේතුවෙන් ශලීල මුණසිංහ මහතා පසුගිය 9 වෙනිදා කොළඹ අපරාධ පරීක්ෂණ දෙපාර්තමේන්තුව මගින් අත් අඩංගුවට ගත්තේය.

ශලීල මුණසිංහ යනු මෛත්‍රීපාල සිරිසේන මහතා පොදු අපේක්ෂකයා ලෙස ජනාධිපතිවරණය ජය ගත් ‘හංසයා‘ ලකුණ හිමි පක්ෂයේ (නව ප්‍රජාතන්ත්‍රවාදී පෙරමුණේ) සභාපති වරයා වීම ද විශේෂයකි. ශ්‍රී ලංකා රක්ෂණ සංස්ථාවට වැඩි කොටස් හිමි ලිට්රෝ ගෑස් සමාගමේ සභාපති ධූරයට ශලීල මුණසිංහ පත් කරන ලද්දේ රක්ෂණය අයත් ඇමැති කබීර් හෂීම් මහතා විසිනි.

ජාත්‍යන්තර බැංකු සංඛේත වන ස්විෆ්ට් (SWIFT) සංඛේත අවභාවිතා කරමින් තායිවාන බැංකුව හැක් කර තිබුනේ පසුගිය 4 වෙනිදා ය. හැක් කර ලබා ගත් ඩොලර් මිලියන 60 ක පමණ හොර මුදල ලංකාව, කාම්බෝජය සහ ඇමරිකාවේ ගිණුම් කිහිපයකට බැර කරගෙන තිබිණ. කාම්බෝජයකට ඩොලර් මිලියන 57 ක්ම බැර කර තිබූ අතර ඇමරිකාවට ඩොලර් මිලියන 1 ක් බැර කර තිබිණ. ලංකාවට බැර කර තිබූ මුදල ඩොලර් මිලියන 1.6 ක් හෙවත් රුපියල් කෝටි 25 ක් පමණ වේ.

මේ බව දැනගැනීමෙන් පසු තායිවාන පරීක්ෂකයන් පිරිසක් වහාම ලංකාවට පැමිණ ලංකාවේ අපරාධ පරීක්ෂණ දෙපාර්තමේන්තුව සමග ඒකාබද්ධව මෙහෙයුම් දියත් කළ අතර සොරකම් කරන ලද මුදලින් කොටසක් බැරව තිබූ ලංකා බැංකුවේ ගිණුමක් හිමි ජේ.සී. නම්මුනි නමැත්තෙකු පසුගියදා අත් අඩංගුවට ගෙන තිබිණ. ඔහු එකී සොරකම් කරන ලද මුදලින් රුපියල් මිලියන 30 ක් හෙවත් කෝටි 3 ක් ඔහුගේ ගිණුමෙන් ලබාගෙන තිබිණ. තවත් මිලියන 8 ක් ලබා ගැනීමට බැංකුවට යද්දී ඔහු අත් අඩංගුවට ගන්නා ලදී.

ඉන්පසුව, ලංකාවට පැමිණි ඩොලර් මිලියන 1. 6 න් තවත් කොටසක් ගිණුම් ගතව තිබූ ‘ශාලිකා පදනමට‘ අයත් ගිණුම ගැන පරීක්ෂාවෙන් සිටි පරීක්ෂකයෝ එය එම ගිණුම හිමි ශලීල මුණසිංහ දැනුවත්ව එම මුදල් ලැබී ඇති බව තහවුරු කර ගැනීමෙන් පසු ඊයේ ශලීල මුණසිංහව අත් අඩංගුවට ගත්තේය. ශලීලගේ ව්‍යාජ පදනමේ ගිණුමට රුපියල් මිලියන 110 ක් හෙවත් රුපියල් කෝටි 11 ක් සොරකම් කරන ලද මුදල් බැර කරගෙන තිබේ. එනම් සොරකමින් ලංකාවට ආ මුදලින් වැඩි කොටසක් බැර වී ඇත්තේ ඔහුගේ ‘ශාලිකා පදනම‘ නමැති ගිණුමට ය.

මෙලෙස හැක් කර ලබා ගත් සොරකම් කරන ලද මුදලින් තවත් කොටසක් ලංකාවේ තවත් ගිණුමකට බැර වී ඇති අතර ඒ ගිණුම හිමි පුද්ගලයා පසුපස ද පරීක්ෂකයෝ ලුහු බඳිමින් සිටිති.

කෙසේ වෙතත් තායිවාන බැංකු ශාඛාව පවසන්නේ තමන්ගේ බැංකුවට අන්තර් ජාලය හරහා ඇතුළු වී සොරකම් කළ ඩොලර් මිලියන 60 ක් තරම් වූ මුළු මුදලින් දැනට සොයා ගැනීමට නොහැකි වී ඇත්තේ ඩොලර් ලක්ෂ 5 ක් වැනි සොච්චමක් පමණක් බවයි. කාම්බෝජය, ඇමරිකාව, ශ්‍රී ලංකාව වෙත බැර වූ අනෙක් සියළු මුදල් සොයා ගෙන ඇතැයි ඔව්හු පවසති.

මීට වසරකට පමණ පෙරද ලංකාවේ ව්‍යාපාරික කාන්තාවක් මේ ආකාරයටම ස්විෆ්ට් සංඛේත අවභාවිතා කර වයර් ට්‍රාන්සර් ක්‍රමය මගින් බංගලා දේශයේ මධ්‍යම බැංකුවෙන් ඩොලර් මිලියන 20 ක මුදලක් සොරකම් කරන ලද අතර ලංකාවේ අපරාධ පරීක්ෂණ දෙපාර්තමේන්තුව මගින් එයද සතයක් අඩු නැතිව සොයා ගන්නා ලදී.

සබැඳි පුවත්

[shareaholic app="recommendations" id="27363332"]

Leave a Reply

Your email address will not be published.