Mahinda’s Man- කහඳගම මිලියන 107ක් සාවද්‍ය පරිහරණයේ

 e2277a8f4c2a392fe3dcd25d8cafec53_L

ස්‌වයං රැකියා සම්මේලනයේ සාමාජික මුදල් රුපියල් මිලියන 107 ක පමණ වංචාවක්‌ සිදු වී ඇති බවට මෙතෙක්‌ සිදු කර ඇති විමර්ශනවලින් කරුණු අනාවරණය වී ඇති බව වංචා විමර්ශන ඒකකය ඊයේ (20දා) කොළඹ ප්‍රධාන මහෙස්‌ත්‍රාත් අධිකරණයට දැනුම් දුන්නේය.

සාමාජික මුදල් සාපරාධී සාවද්‍ය පරිහරණයට යොදා ගැනීම සම්බන්ධයෙන් ස්‌වයං රැකියා සම්මේලනයේ සභාපති මහින්දරත්න කහඳගම, ලේකම් චානක අශෝක හෙට්‌ටිආරච්චි හා භාණ්‌ඩාගාරික ලක්‍ෂ්මේන්ද්‍ර කුමාර ද සිල්වා නමැති සැකකරුවන්ට එරෙහි පැමිණිල්ල ප්‍රධාන මහෙස්‌ත්‍රාත් ගිහාන් පිලපිටිය මහතා හමුවේ කැඳවනු ලැබූ අවස්‌ථාවේදී වංචා විමර්ශන ඒකකය එසේ දන්වා සිටියේය.

සිද්ධියට අදාල පැමිණිල්ල කැඳවනු ලැබූ අවස්‌ථාවේදී රක්‍ෂිත බන්ධනාගාර ගත කර සිටින සැකකරුවෝ තිදෙනා බන්ධනාගාර නිලධාරීන් විසින් අධිකරණය හමුවට ඉදිරිපත් කරනු ලැබූහ.

පැමිණිල්ලට අදාළව විමර්ශන පවත්වන වංචා විමර්ශන ඒකකය කරුණු දක්‌වමින් ස්‌වයං රැකියා සම්මේලනයට අනුයුක්‌ත පිටකොටුව වෙළෙඳුන් 810 දෙනාගෙන් 125 දෙනකුගේ ප්‍රකාශ ලබා ගත් බවත් මෙතෙක්‌ සිදු කර ඇති විමර්ශන අනුව සාමාජික මුදල් රුපියල් මිලියන 107 ක පමණ වංචාවක්‌ සිදුව ඒ තුළින් රජයට වැට්‌ බදු ලෙසින් හිමි විය යුතු රුපියල් ලක්‍ෂ 13 ක්‌ පමණ අහිමි වී ඇති බවත් කියා සිටියේය.

පළමු සැකකරුගේ පාර්ශවයෙන් සාක්‌කිකරුවන්ට තර්ජන එල්ල වී ඇති බවද පැවසූ වංචා විමර්ශන ඒකකය පැමිණිල්ලට අදාල තවදුරටත් විමර්ශන පවත්වන බැවින් සැකකරුවන් ඇප මත මුදා නොහරින ලෙසට ඉල්ලා සිටියේය.

අධිකරණය මගින් කළ දැනුම් දීමක්‌ අනුව පැමිණිල්ලට එක්‌ වූ කොළඹ මහ නගර සභාවේ භාණ්‌ඩාගාරිකවරිය කරුණු දක්‌වමින් කඩ හිමියෝ වෙතින් බදු මුදල් කුලී මුදල් එකතු කිරීමේ කටයුතු සිදු කරනුයේ නගර සභාව බවත් 2014 දෙසැම්බර් 31 දා වන විට කඩ හිමියන්ගෙන් රුපියල් මිලියන 107 ක මුදලක්‌ නගර සභාවට ලැබිය යුතු බවත් දන්වා සිටියාය.

2010 ජුනි 15 දා වෙළෙඳ සල් 287 ක්‌ ද 2011 ජුලි 15 දා වෙළෙඳ සැල් 537 ක්‌ ද ලබා දී ඇති බවද පැවසූ භාණ්‌ඩාගාරිකවරිය වෙළෙඳ සල් හිමියන්ගෙන් අය විය යුතු මුදල් අය කර ගැනීමට කටයුතු යොදන බවත් දන්වා සිටියාය.

සැකකරුවන් වෙනුවෙන් පෙනී සිටි නීතිඥවරු කරුණු දක්‌වමින් මොවුන් මුදල් ලබා ගත් බවට අනාවරණය වීමක්‌ නොමැති නිසා හා පැමිණිල්ලෙන් කියෑවෙන චෝදනා පොදු දේපළ පනතට යටත් නොවන නිසා සැකකරුවන් ඇප මත මුදාහරින ලෙස ඉල්ලා සිටියහ.

ඉදිරිපත් වූ කරුණු කෙරෙහි සැලකිලිමත් වූ මහෙස්‌ත්‍රාත්වරයා සැකකරුවන් ඇප මත මුදා හැරීම ප්‍රතික්‍ෂේප කරමින් ඔවුන් ලබන 06 දා තෙක්‌ රක්‍ෂිත බන්ධනාගාර ගත කර තබන ලෙසත් එදිනට විමර්ශනයේ ප්‍රගතිය ඇතුළත් වාර්තාවක්‌ ගොනු කරන ලෙසත් නියෝග කළේය.

 

 

Mahinda Rajapaksha’s supporter Khandagama accused of misusing over a billion

සබැඳි පුවත්

[shareaholic app="recommendations" id="27363332"]

Leave a Reply

Your email address will not be published.